Verojatno ste se i vi zapitali kaj se događa z vremenom? Čovek nezna kak se obleči. Dok kojim slučajem prejdem čez grad vidim da su ljudi čist zbunjeni. Tak neki dan vidim ozbilneše ljude v zimski jaknama a dva mlada čoveka v kratkim hlačama i majici. Dokle bu to trajalo? Doma tak i tak moramo čučati al se od vremena do vremena moramo nadisati i friškoga zraka. Pomalo panično pratimo vremenske prognoze na internetu a nedaj bože da mi promakne Vakulina prognoza. Dobro su neki dan napisali na jednome portalu da još nesmemo pospremati zimsku obleku. Nek pričeka još koj dan a onda bumo valda mam skočili v kupače gače.
Jel stvarno došlo prolječe?
Spominjam se neki dan z pajdašom Tončom i nekak sramežljivo zbrajamo kaj nam bu ostalo vu vočnjakima dok se vreme pak ustabili. Kolko sam videl doma bu breskva preživela jer je smeštena između dve kuče al pojma nemam kaj se bu dogodilo v goricama. Gorička breskva je več “pobrana” a nisam još siguran kaj bu z jabukama i kruškama.Več par dana nisam otišel do Mirnoga dola kaj mi se nigda ni dogodilo v ovo doba leta. Morti me mlađi ljudi nebuju razmeli al nas starešu gospodu još nekaj prati. Ovakvo vreme pogađa nas meteopate pa za svaku bol v kolenu, v križima, za neraspoloženje ili šetanje tlaka gore-dole, mam okrivimo vreme. Makar ruku na srce ima i v tome nekaj. Dok me nazove Atač obično je prvo pitanje:”Stari moj. Jel i tebe danas sve boli kak i mene?” Negda smo se smijali našim starcima dok su po reumi prognozirali promenu vremena a sad je to dio našega svakodnevnoga razgovora. Kak bi neki stručnjaki rekli “trebamo misliti pozitivno” pa bumo tam oko prvoga maja krenuli malo v prirodu. Samo prosim v malim grupama i na “razmaku od dva metra”.
Proljetni jelovniki
Sad vidim da sam se prošli tjedan malo zaletel z onim prvim roštiljanjem v goricama. Zavaral nas je jedan kolko-tolko lepi vikend. Fakat smo imali sreču da smo to obavili jer do današnjega dana dok ovo pišem niste mogli spojiti dva normalna dana koja bi mogli provesti dve-tri vure na otvorenom. Kak smo več dobro zagazili v prolječe nekak mi se čini da bi trebalo prejti na malo lakše jelovnike da odmorimo telo od one teške zimske hrane. Doduše moram vam nekaj priznati. Ostalo mi je v škrinji još nekaj kiseloga zelja koje moram svakak iskoristiti za jednu sarmu ili sekeli gulaš. Ja sam ipak Podravec i šteta mi je tak nekaj hititi. Šteta mi je hititi i ostanjke od Vuzma pa i to moram iskoristiti z kakvim čušpajzom ili nečim sličnim. Treba samo napraviti malu inventuru v škrinji pa bumo mam znali kaj se mora pod hitno potrošiti.
Neki sam dan videl kratku foto-reportažu z koprivničkoga placa i moram vam reči da nisam videl nekakvu preobilnu ponudu za proljetne jelovnike. Srečom kaj Podravka navek nudi kvalitetno konzervirano i smrznuto povrče pa je to velka pomoč v slaganju jelovnika. Ja redovito koristim mahune i grašak i moram vam reči da sam baš zadovoljan z tim konzervama. Doduše vu velkim trgovačkim centrima morete dobiti ponudu “friškoga povrča i voča” i sred zime samo je pitanje od kud je to došlo. Tak mi je jako drago dok za Vuzem nudiju mladoga krumpira z Egipta, a mandarine z Turske ili jabuke z Poljske. Priznajte da je lepše dok vam ponudiju nekaj domače recimo kumice z Herešina ili Starigrada. Trenutno su v ponudi šparoge kakti veliki specijalitet ali to fakat moraju biti naše nabrane negde v Dalmaciji ili Istri. Sečam se jedne davne zime koju sam prek dva meseca provel na Malom Lošinju. Kak Lošinj ima jako blagu klimu negde krajem sečnja smo na šetnji oko Čikata, središtu lošinjskoga turizma, mogli nabrati mlade šparoge koje su več nakon jedne vure završile na tanjuru. Za pripremu šparoga malo prosurfajte po internetu bute našli vrpu praktičnih recepti za kojekakve priloge ali i kak posebno jelo. Sad je i vreme za proljetne šalate. Moji su favoriti bili navek matovilec i radič iliti regač. Jedan moj stareši međaš v Draganovcu je svako prolječe dolazil k meni i pital dal sam več z nečim šprical trsje? Ak nisam onda bi si on nabral vrečicu regača za jednu dobru zdelu šalate. Naravno z puno češnjaka i z koščičnim uljem. Meni i regač i matovilec šalata jako pašu z kuhanim jajcima a to more biti i jedan pravi glavni obrok. Ak još imate kakvoga pohanca ili zdeno pečenje od jučer, pa to narežete onak na rezance i sve skup zmešate i dobro začinite imate pravu deliciju. Paše tu i kakav paradajz samo kaj ja ne kupujem ovoga prvoga vodenoga koj ima samo jednu kvalitetu: crveni je.
Dravski peski
Neki dan me baš iskreno razveselila vest da ženice z Turističke zajednice Kloštra Podravskoga okupljene oko Društva Dravski peski pripremaju nekaj novo ili da bum precizneši nekaj “staro na novi način”. Te vredne ženice očeju oživeti zaboravljene recepte z toga kraja koji su nepravedno zapostavljeni. To me jako zainteresiralo jer sam ja na tome tragu več letima. Svojevremeno sam imal v našoj Knjižnici “Fran Galović” nekolko izlaganja na temu gastronomije a jedna je tema bila “Podravski zimski jelovniki”. Naravno da se često i podsetim bakine i mamine kuhinje koje su na svoj način njegovale celi život tu domaču podravsku kuhinju. Jednom sam se pak prilikom jako “obrušil” na pokušaje uvođenja nekakvih “noviteta” v podravski svatovski jelovnik. Tak je jen mladoženja, sin mojega dobroga prijatela, štel ponuditi gostima hamburgere po koje bi gosti sami dolazili kak da su v studentskoj menzi. Prestrašno. Zadnji čas sam sprečil katastrofu. Podravski svatovski jelovniki su po mojem iskustvu od navek bili jako dobri i bogati za Podravce a još više za one koji bi došli prvi put na podravske svate.
Da se vrnem na Podravske peske. Ove su ženice snimile dost materijala z podravskim jelima a v planu je da tiskaju i kuharicu “Zaboravljena jela Podravine”.To bi bilo fakat jedno osveženje jer valda nema kraja v Lepoj Našoj koj nema svoju kuharicu. Več sam stotinu put rekel da nema na svetu tak male zemlje koja ima takvo bogatstvo gastronomije. Dok krenete od istoka, od Slavonije, prek naše Podravine, Međimurja, Zagorja, spustite se prek Like na obalu, imate neverojatnu ponudu delicija a da ne govorim o vinima. Toj neverojatnoj ponudi vu velkoj meri danas pridonose OPG-i i naravno mnogobrojne udruge vrednih ženica. Gledal sam nedavno jednu takvu emisiju z varaždinskoga kraja a i Međimurci njeguju svoju domaču kuhinju več letima. Malo sam nezadovoljan kaj mi Podravci navek malo kasnimo za drugim našim kajkavskim krajevima. Svojedobno sam bil malo kritičan dok su Zagorci napravili velki korak prema priznanju mlinci i štrukli kak autohtonih proizvoda, makar se v Podravini te delicije pripremaju od navek i to jako kvalitetno. Od navek smo to doživljavali kak naše podravske delicije.
Još jemput bravo za Podravske peske. Držim im fige da uspiju zgurati tu ideju do kraja.
Ovaj tjedan bum napravil jelovnik jedne kombinacije onoga kaj mi je ostalo od zime i Vuzma i onoga kaj spada v proljetne jelovnike. Nekak mi se čini da bi v sledečim mesecima trebala prevladati lakša hrana z više piletine, ribe i povrča.
Pondelek
Juha: Krem juha od ostanjki jučerašnje juhe
Glavno jelo: Pileča jetrica vu saftu, hajdinska kaša
Desert: Da ne razočaram pajdaša Tonča: kolač od jučer
Tork
Juha: Paradajzova juha z noklecima
Glavno jelo: Musaka od poriluka ili kelja; meni paše i jedno i drugo
Desert: Ananas-kockice z par kapi ruma
Sreda
Juha/Glavno jelo: Čušpajz od mahuni; v to bum del falačece kuhanoga bunceka od Vuzma
Desert: Kompot o jabuki
Četrtek
Juha: Juha od mrkvice i graška
Glavno jelo: Svinjska rebra pečena na ploškama krumpira
Desert: Čaša crne pive
Petek
Juha: Prežgana juha z jajcima
Glavno jelo: Frigane srdelice, krumpir šalata
Desert: Čaša vina
Subota
Juha/Glavno jelo: Sekeligulaš, pire krumpir
Desert: Palačinke z pekmezom/kinderladom
Nedela
Ostalo mi je od Vuzma nekaj janjetine pa bum složil
Juha/Glavno jelo: Janječe-povrtni složenac; osimjanjetine del bum mrkvu, celera, friško zelje, dva-tri krumpira, par kapi maslinovoga ulja i naravno dobro začinil. Kakti mali neobični dodatak bum hitil v sve to malo pisanoga špeka.
Desert: Kifli z makom
:(Još nema komentara