Moj profil

Stari maškaroni

Ovo je kratak osvrt na maškare u Crikvenici nekad i sad, pisala sam po crikvenički pa se nadam da ćete razumijeti.

I ovo leto, ko i sako, prvu subotu iza Tri kralji va Crikvenice su počele maškare, ta stara užanca ka se va Crikvenice održava još od kraja 19.stoljeća.

"BUBANJ I MUZIKA SLOŽNO UDARAJ" čulo se je po cestami i kalami moga grada ča me je potaklo, ko istinskog ljubitelja maškar, da se spametin nekeh davneh dani i leta iza nas. Niman puno let ali se sjećan kad se je nono spravljal va maškare. Obukal bi samo naopak jaketu i lice bi malo načrnil i to bi bila maškara. Zeli bi padele, poklopci, bilo ča s čen bi mogli lupat, kranpat da budu čin glasniji, veseliji i da zlo va prošlen letu potiraju. Danas kad o tome razmišljan mislin da su ljudi prije stvarno bili veseliji, sega bi se sjetili samo da se nasmeju, vesele, popiju, tako veseli šli bi spat i pozabili na se probleme ke su imeli, a imeli su ih. Si ljudi su bili isti, neki je imel više, neki manje, ali su se družili.

Ni bilo važno ki kako zgleda, dal ima mobitel, ke marke auto, kuću, dal će poć na skijanje... Hodili bi po cestami, lupali, pozdravljali po kućami, žene bi spekle friti i puhanci i s ten bi dočekale maškare.



Kašnje su se počele održavat maškare saki četrtak, subotu i nedelju, najprije va domu kulture a onda kad je dom zrušen va hotelu.

Sad više ni doma, ni hotela, ljudi se više ne druže na onaj način, si su nekako zaprti va sebe. Sad imamo šator. Saku subotu imamo drugog pjevača ki nas "zabavlja". Ni više našeh nonići ni nonic s naopak obučenun jaketun i grdun maskun na licu. Sad su neka druga deca, va maškare se gre po zadnjoj mode, se mora bit lipo zašiveno, uštirkano, speglano. Nesmeš bit grd, moraš bit lip, namazan, našminkan, aš ako ne neki bi ti se mogal narugat. NISI FENSI.

Žalin za nekemi davnemi dani kad je malo ljuden trebalo za sriću. I sad treba malo samo neki to stendi prije neki kašnjeje...

Uz ovo sjećanje napisala san jednu pjesmicu i prvi put ovako neš objavljujen te se nadan da će van se dopadat.

GRDA MAŠKARONKA

Obukla je odijelo

od oca, črno,

malo prevelo.

Šaru košulju

od nona zi suhita

naopak jaketu

da je čin manje lipa.

Na rukami črne rukavice

na glave grda maska

da pokrije lice.

Okolo stoli je skakala,

lancami kranpala,

ljudi po nogah tukla

moja mat

va maškare je šla!

Slika nije moje autorsko djelo mada ju imam u svojoj kolekciji doma a za ove stranice sam ju preuzela sa www.maškare.net , mislim da je slikao Foto Ivančić.

Inače na ovoj web stranici možete pogledati sve o maškarama u Crikvenici.

:(Još nema komentara

Budi prva/i, podijeli svoje mišljenje o slici i pomozi nekome u odabiru savršenog jela.