Moj profil

Bakalaj na bjanko(bakalar na bijelo)

28
Bakalaj na bjanko(bakalar na bijelo)

Bakalaj na bjanko kako se je vajka prontiva u mojoj fameji,kako su ga prontivali mati i tac,a ja san njin vajka pomogla...kako ga je prontivala moja baba,kako ga prontiva svaka prava gospodarica poli nas u Istri.Poli nas je užanca da se bakalaj na bjanko prontiva tri puta na lito-za viliju Božju(Badnjak),za Veliki petak(pred Vazan-prije Uskrsa)i kad se pretakalo mlado vino...Uz ovu ričetu i uz bakalaj vežu me lipi rikordi...kad smo hodili poli babe na užinu za vilju Božju a kužina je zadavala po bakalaju.Nikad suhega bakalaja kad san bila mala ni bilo za kupiti  u butigama,pa bi baba vajka urdinala mojen ocu kad smo hodili u Trst"sinko nemoj mi zabiti kupiti bakalaj"...i mati ga je vajka kuhala na Veliki petak,a tac bi ga pokle stuka na ruke ,dok ga je on tuka z drvenin baton ja san mu u njega pomalo ulivala ulje,a mati bi onda umisila domaće pasutice...ovo lito jopet rikordi i mirisi djetinjstva...bakalaj san skuhala nako kako san se navadila od moje matere i babe,a muž ga je pokle stuka na ruke(i ja san mu malo pomogla) ... pa neka to bude moja dvistota ričeta

Bakalaj na bjanko kako se je vajka prontiva u mojoj fameji,kako su ga prontivali mati i tac,a ja san njin vajka pomogla...kako ga je prontivala moja baba,kako ga prontiva svaka prava gospodarica poli nas u Istri.Poli nas je užanca da se bakalaj na bjanko prontiva tri puta na lito-za viliju Božju(Badnjak),za Veliki petak(pred Vazan-prije Uskrsa)i kad se pretakalo mlado vino...Uz ovu ričetu i uz bakalaj vežu me lipi rikordi...kad smo hodili poli babe na užinu za vilju Božju a kužina je zadavala po bakalaju.Nikad suhega bakalaja kad san bila mala ni bilo za kupiti  u butigama,pa bi baba vajka urdinala mojen ocu kad smo hodili u Trst"sinko nemoj mi zabiti kupiti bakalaj"...i mati ga je vajka kuhala na Veliki petak,a tac bi ga pokle stuka na ruke ,dok ga je on tuka z drvenin baton ja san mu u njega pomalo ulivala ulje,a mati bi onda umisila domaće pasutice...ovo lito jopet rikordi i mirisi djetinjstva...bakalaj san skuhala nako kako san se navadila od moje matere i babe,a muž ga je pokle stuka na ruke(i ja san mu malo pomogla) ... pa neka to bude moja dvistota ričeta

Sastojci

oko 30 deki suhega bakalaja
2 štruka česna
par zrni črnega papra
1 suhi list lavrike
malo soli
i još
za finiti bakalaj
1 dec domaćega ulja od ulike(maslinovo ulje)
3 do 4 štruka česna
2 do 3 deca kupovnega ulja(suncokretovog ulja)
malo soli
malo friško meljenega črnega papra
za posluženje
- kuhane pasutice
malo domaćega ulja
malo friško meljenega papra
ili
- prepečene fete starega kruha
-malo črnih ulika iz ulja

Priprema

1.

-Suhi bakalaj umotati u krpu i onda ga dobro stući drvenim batićem sa svih kraji,stućeni suhi bakalaj staviti u lonac ili kakovu škudelu,cilega prekriti hladnon vodon i tako ga puštiti da se moči najmanje dvajset i četiri ure,par puti morete i kambijati vodu i staviti ga jopet močiti u novu vodu.(Ja san ga močila dan i po.)

2.

-Kad je bakalaj dobro namočen napro ga uperite spod vode i onda ga stavite u lonac u kojen ćete ga kuhati,u lonac vržite i dva štruka česna,par zrni črnega papra,jedan suhi list lavrike i posolite,a onda ulijte vode da dobro pokrije bakalaj i stavite ga kuhati na tihi voganj tri ,četiri ure dok bakalaj ne omekša.Morete ga kuhati i u expres loncu-ja san ga kuhala u expresu jenu uru i po.

3.

-dok van se kuha bakalaj(pred kraj kuhanja)učistite krumpire,uperite hi i zrižite hi na polovice ili na miće kuščiće i stavite hi kuhati u mali lonac u posoljenu vodu;ko čete krumpire morete vrči da se kuhaju skupa z bakalajon(tako ga je kuhala moja pokojna mati)-ako ga kuhate z bakalajon onda hi skuhate cile bez da hi rižete(ja san krumpire kuhala posebno)

4.

-Kad je bakalaj kuhan procidite ga kroz školobrodo,malo puštite da se prohladi a onda ga dobro učistite od kosti i od črne kože.Učišćene kuse bakalaja još malo s rukami razdvojite na manje kuščiće i stavite ga u padelu ili u zdilu u kojoj čete stući bakalaj.

5.

-Bakalaj je najbolje da stučete na ruke z drvenim batićen(mi smo ga tukli z drvenim batićen skin se tuče pire krumpir),a morete ga tući i z mikseron.

-U mali lončić staviti malo domaćega ulja od ulike,u njega stavite par štruki česna kega prije zrižete na kuščiće i malo zamlačite na tihen vognju ulje s česnon,tako da česan pušti aromu (stavite u kraj,tribati će van za kašnjije)

6.

-Bakalaj tučite z baton i polako dok ga tučete mu dodajte malo po malo domaće ulje i tako tučite dalje,onda mu dodajte malo po malo uno ulje ča ste aromatizirali z česnon(morete u bakalaj dodati i česan,a česan morete i maknuti i ne vrći ga u bakalaj-kako volite).Kad je bakalaj malo stučen i ni više u većin kusima dodajte mu kuhani krumpir na kuščiće i tučite ga dalje.

7.

Cilo vrime dok tučete bakalaj dodajte mu i dalje malo po malo ulja,ja najprije dodajen domaće ulje od ulike(jedan dec ulja)a pokle dodajen kupovno ulje(suncokretovo ulje)-njega se vrže dva do tri deca sve skupa-nike pute više nike pute manje.Moja baba je govorila da se ulja vrže koliko ga bakalaj popje dok ga tučete.

Kad je bakalaj napol stučen onda mu dodajte soli i friško meljenega črnega papra po vašen guštu.

8.

-Bakalaj tučite dok se napije ulja i ne dojde lipo kremast i lipe bile boje.Na kraju još malo posolite i popaprite ako triba.

9.

-uz bakalaj je najbolje poslužiti skuhane istarske pasutice samo malo zabiljene z uljen

-kad bakalaj vržete na pijat zmeljite na njega malo črnega papra i zabilite ga z malo domaćega ulja

10.

-Bakalaj ki van ustane spravite u staklenu škudelicu,zaprite z hermetičkim poklpocen i onda ga morete čuvati u frižideru par dan.

Posluživanje

-Bakalaj poslužiti za ručenje uz istarske pasutice i uz mižo dobrega vina(istarska malvazija ili teran).

-Dobar je i kad se namaže na fetice prepečenega starega kruha i uz ulike iz ulja.

-Dobar tek van želin!

:(Još nema komentara

Budi prva/i, podijeli svoje mišljenje o receptu i pomozi nekome u odabiru savršenog jela.

Kako je tebi ispao recept?

Poslikaj i pohvali se! :)