Moj profil

Kapuz kiseli z domaćemi kumbasici i vinon z peknjice

4 osobe
50 minuta
13

Prišal je h Matujan voz kapuza
voz kapuza kiselega
Joj, joj, joj
konpir i fažol
slana riba i palenta
to je sve dobro!

Sastojci

za 4 osobe
500 g kiselega kapuza
4 pari kumbasic
4 česni česna
1 žlica dobre prašće masti
par listi javorike
popar va zrne
žmuj (1,5 dl) belega vina (kastafske Belice)
po voje soli al malo Vegete (ne preveć, aš su i kapuz i kumbasice slani)

Priprema

1.

Steplite peknjicu na 220°C.

2.

Široku suru (bi bilo boje ako je zemjana, ma i saka druga će bit dobra) pomažite z mastun. Na to rastresite kiseli kapuz, sakuda jednako.

3.

Česan olupite i prerežite napol, pa zarivajte va kapuz na par mesti. Hitite i par zrni popra i par opraneh listi javorike.

4.

Odzgor kapuza stavite dobre domaće kumbasice po dugen zrežene napol.

5.

Se skupa zalejte z belen vinon.

6.

Pokrijte z aluminijskun foljun na ke štikadenton prošupite par škujic da more sapa hodit vanka. Pečite jeno pol ure, pa znamite folju i pečite još kvarat ure, al malićo manje, da se odzgor lepo zapeče.

Posluživanje

Obed po domaću je parićan. Hten skuhajte palentu, običnu al konpiricu, a morete za gušt odzgor zribat i trdega ovčega sira. I ne pozabite na žmuj vina da jilo lagje gre zdolun!

:(Još nema komentara

Budi prva/i, podijeli svoje mišljenje o receptu i pomozi nekome u odabiru savršenog jela.

Samo za čitanje! Opcije dodavanja recepata i ostalog sadržaja dolaze uskoro! :)

Saznaj više